us ne kahaa ke ham bhii Khariidaar ho gaye
bikne ko saare log hii tayyaar ho gaye
us ne kahaa ke aik wafadaar chaahiye
saare jahaaN ke log wafadaar ho gaye
us ne kahaa ke ko’ii gunah-gaar hai yahaaN
jo paarsaa the vo bhii gunah-gaar ho gaye
us ne kahaa ke aajiz-o-miskiiN hai ko’ii
sab log gard-e-kuucha-o-baazaar ho gaye
us ne kahaa ke kaash ko’ii jangjuu mile
aapas mein yaar barsar-e-paikaar ho gaye
us ne kahaa “Adeem” mera haath thaam-na
chaaron taraf se haath namudaar ho gaye
