guzar rahay hain jo mujh par azaab us kay hain
keh meri chashm e tamana men khawab us kay hain
mein zakhm zakhm hoon mera naseeb hain kaantay
woh rang rang hai saaray gulaab us kay hain
kitaab maeri,qalam mera,soch bhi meri
magar jo likhay mein nay woh baab us kay hain
nhi hai meray muqaddar ka aik bhi taara
yeh kehakashan yeh maah o aaftab us kay hain
visaal o hijr ka mausom usi ka mausom hai
sawaal meray hain shayad jawaab us kay hain
woh meri zaat ka aik mustanid hawala hai
kitaab e ishq kay saaray nisaab us kay hain
mein hairaton kay samandar men gharq hoon ejaz
tamaam aks sar e satha e aab us kay hain
