jee chahta hai, kis ne kaha, mat khareediye
daulat se husn, husn se daulat khareediye
kuch log jee rahe hain sharaafat ko bech kar
thoRii bahut unhein se sharaafat khareediye
phaila hai kaaro-baar-e-muravvat, so aap bhii
sab kii tarah kisii kii zaroorat khareediye
apnii pasand apne muqaddar kii baat hai
sub'h-e-azal se sham-e-qayaamat khareediye
gehraaiyon kii fikr men kyun mubtala hain aap
likhiye ghazal awwaam pe, shoharat khareediye
kahte hain jisko she'r duaa ka muqaam hai
ruswaaiyaan kamaaiye, ibrat khareediye
aankhen rahiin to rang bahut, roshanii bahut
ab ho sake to parda-e-ghaflat khareediye
kyun aap sharm'saar hain apne wajood se
sach boliye, jahaan kii adaawat khareediye
dunya ke rog jheliye kamre men baith kar
khiRkii ke paas jaaiye, hasrat khareediye
umr-e-azeez, waqt nahiin mol tol kaa
baazar uth chuka, ajii hazrat, khareediye
be'rang hai hikaayat-e-khoon-e-jigar Khizaan
khoon-e-jigar se rang kii qeemat khareediye
Mahboob Khizaan
