rat'jagon ke sehra main khwaab jab ujaR jaain tum udaas mat hona
zindagii ke maile main hum agar bichaR jaain tum udaas mat hona
jin pe naam likhe hoon un ujaR shakhon per kab bahar aati hai
aarzuu ki tehni se jab gulaab jhaR jaain tum udaas mat hona
jaan, kya zaroori hai dasht e naa'rasaai main ik dua bhi poori ho?
hum agar riwaajon ki sooliyon pe gaR jaain tum udaas mat hona
waqt ik darinda hai aur hum sabhi is ki dehshton ki zad main hain
jab ye be'sakoon lamhe apni zid pe aR jaain tum udaas mat hona
jab'r ki fizaaon main muskura ke ji laina ye bhi ik ibaadat hai
chahe karb ke saye mere kad se baRh jaain tum udaas mat hona
kuch bhi ho mager apne dil'nashiin tabassum se zab't ka bharam rakhna
chaahe hum bichaR jaain kyun na hum ujaR jaain tum udaas mat hona
